Antton Babaze Caf-Elhuyar saria

Ander Tobalinak, Antton Babazek, Uzuri Albizuk, Enekoitz Telleriak eta Mikel Ojinagak CAF-Elhuyar sarien 30. edizioan egindako dibulgazio-lanaren aitorpena jaso dute. Miren Basarasek jaso du merezimenduaren saria.

CAF-Elhuyar sariek dibulgazio-lana aitortu dute 30. edizioan, “konta (kta) tu” lelopean, egileak beren ezagutzak, ikerketak edo proiektuak ematera eta “gizartearekin konektatzera” animatzeko. Elhuyarrek CAF enpresarekin elkarlanean eta Neikerren babesarekin antolatzen duen lehiaketaren edizio honetan, epaimahaikideek Ander Tobalina gasteiztarra saritu dute dibulgazio-artikulu kategorian, “Arau berriak, jostailu berriak” izeneko lanagatik. Epaimahaiak nabarmendu duenez, Tobalinak “gaurkotasun handiko gaia jorratu du eta teknika berriek espazio berriak irekitzen dituztela erakusten du”.

Doktore tesian oinarritutako artikuluaren saria Antton Babaze CFMko ikerlari irundarrak jaso du, “Argi ibili kuantikarekin” lanagatik. Kasu honetan, egileak transmititzen duen «pasioa» azpimarratu nahi izan du epaimahaiak, «argia eta irakurtzeko erraza» den artikulu batean.

Kategoria honetan, gainera, epaimahaiak aipamen berezia duen beste lan bat saritu nahi izan du. Horrela, Uzuri Albizu gasteiztarra ere saritu du “Matematika, hezkuntza eta generoa gurutzatzen diren lekuak. Ahots feministek lagundutako kartografia bat). Lan hau positiboki baloratu da, «diziplinartekotasunaren adibide bikaina eta ondo azaldutako tesia delako eta matematikaren ikuspegi berri bat eskaintzen duelako».

Zientzia-kazetaritzaren kategorian, Enekoitz Telleria andoaindarraren “Silfioaren enigma” izan da saritutako lana, eta epaimahaiak “gai ezezagun batekiko jakin-mina pizteko orduan asmatu egin duela” esan du. Artikulua iazko ekainean argitaratu zen “Berria” -n.

Neiker sariak lehen sektoreko lanak saritzea du helburu, eta aurten Mikel Ojinaga bermeotarrak jaso du saria, “Birusen aurkako gudari irrabarratsua” lanagatik. Kategoria honetako epaimahaikideek “gaiak sektorean duen garrantzia” azpimarratu dute, eta egileak “oso argi azaldu du zein den arazoa eta nola aurre egin”.

Irabazle guztiek 2.000 euroko saria eta Imanol Andonegi Mendizabalen eskultura bat jaso dituzte. Sari horiez gain, CAF-Elhuyar lehiaketan 5.000 euroko beka ere ematen da, zientziaren eta gizartearen arteko lotura egiteko proiektuak sustatzeko.

Merezimendu-saria

Era berean, Elhuyar Fundazioaren Patronatuak CAF-Elhuyar saria ematen dio merezimenduari, «euskararen normalizazioan eta zientzia eta teknologiaren dibulgazioan nabarmendu diren pertsonei omenaldia egiteko». Hogeita hamargarren edizio honetan, Miren Basarasek jaso du saria, «euskarazko dibulgazioan erreferentea delako, bereziki mikrobiologiaren arloan».

Patronatuak Covid-19aren pandemian egindako ekarpena aitortu nahi izan du, gaixotasuna ezagutarazteko eta prebentzio-neurriak hartzeko, «betiere modu ulergarrian, alarmarik sortu gabe eta ikuspegi sozial garrantzitsuarekin». Gainera, “euskarari eta euskarazko komunikabideei emandako lehentasunezko tratamendua” azpimarratu nahi izan du Patronatuak.