Ester Verde Sestok Ramon y Cajal Beka ospetsua jaso du

Ester Verde Sesto doktoreak, gaur egun MPC-CFMko polimeroen eta materia bigunaren taldean lan egiten duen Ikerbasque Fellowk, Zientzia eta Berrikuntza Ministerioaren Ramón y Cajal beka jaso du. Beka honek ikertzaile nabarmenenak aintzatesten ditu, Espainiako komunitate zientifikoan egiten duten lana babestu eta sustatu nahiean.

Deialdi honen xede diren laguntzen helburua da ikerketa-erakundeetan ibilbide oparoa duten ikertzaile espainiarrak eta atzerritarrak sar daitezen sustatzea, Espainiako Zientzia, Teknologia eta Berrikuntza Sistemako ikerketa-erakunde batean posizio egonkorra ziurtatzeko gaitasunak eta trebetasunak eskura ditzaten, beren jarduera profesionala atzerrian garatzen denbora batez daramaten ikertzaileen integrazioa berariaz sustatuz.

Verde doktoreak material berriak garatuko ditu, guztiz/partzialki deuteratuta, hainbat arlotan aplikatzeko, hala nola energia biltegiratzean, katalisian eta biomedikuntzan. Bere ikerketak material polimeriko adimendun berrien garapena ere hartuko du barne.

Ester Verde-Sesto Zientzia Kimikoetan lizentziatu zen Santiagoko Unibertsitatean (USC) 2004an. Bi master lortu zituen, bata Kimika Organikoan USCk 2007an eta bestea Polimeroen Zientzian UIMPek 2009an. 2010ean, doktoretza hasi zuen Polimeroen Zientzia eta Teknologia Institutuan (ICTP/CSIC), eta Polimero Organiko Porotsuak (POPak) katalizatzaileen euskarri gisa garatu zituen. 2014an amaitu zuen doktoretza. Ondoren, material polimeriko funtzional berriak esploratzeko duen grinak bultzatuta, bere ikerketa-ibilbidea garatu du nazioko eta nazioarteko hainbat erakundetan, hala nola Madrilgo Materialen Zientzia Institutuan (ICMM/CSIC, Espainia), Adolphe Merkle Instituten (AMI, Friburgo, Suitza), POLYMATen eta MPC-CFMn (Donostia, Espainia).