CFM eta CIC nanoGUNE Elhuyarreko Zientzia Azokaren barne

Published: Otsaila 27, 2020
https://zientzia-azoka.elhuyar.eus/

CIC nanoGUNE-k eta CFM-k, Elhuyar Zientzia Azokarekin bat egin dute gazteen artean zientzia eta teknologia sustatzeko helburuarekin

  • Hitzarmenari esker, 2020ko maiatzaren 9an Bilbon ospatuko den Elhuyar Zientzia Azokaren laguntzaile izango dira.
  • nanoGUNE-n eta CFM-n bi eguneko egonaldiaz gozatu ahal izango dute Elhuyar Zientzia Azokako irabazleek, ikertzaileak eta euren jarduna gertutik ezagutzeko.

Elhuyar Zientzia Azoka ekimena gazteek garatutako proiektuen azoka da; ikerketa zientifikoa eta garapen teknologikoa barrutik bizitzeko aukera.

Ikasturte berriarekin, nanoGUNE Ikerketa Zentro Kooperatiboak eta Materialen Fisikako Zentroak (CFM, CSIC eta UPV/EHUren arteko zentro mistoa) ekimenean modu aktiboan parte hartzeko konpromisoa hartu dute gaurkoan. Hala, bi ikerketa-zentroek proiektu estrategikotzat jo dute Elhuyar Zientzia Azoka, gazteen zientzia-bokazioak pizteko, gizartearen kultura-zientifikoa sustatzeko, eta bertako eta gaur egungo zientzia hedatzeko. Bide horretan, ekimenak behar besteko neurria eta irismena izan dezan, sinatzaileek oso garrantzitsutzat jotzen dute Euskal Herriko zientzia- eta teknologia-sareko eragileak elkartzea.

Horrenbestez, gaur goizean sinatu dute lankidetza-hitzarmena nanoGUNE-ko zuzendari Txema Pitarkek, Materialen Fisikako Zentroko (CFM, CSIC zentro mistoa eta UPV/EHU) zuzendari Daniel Sánchez Portalek eta Elhuyarreko zuzendari nagusi Jon Abril Olaetxeak.

Elhuyarreko zuzendari nagusiak azaldu duenez, “euskaratik, teknologia eta ezagutza sortuz, eta zientzia zabalduz, gizarte aktibo, kritiko eta berdinzalea eraiki nahi dugu, eta, bide horretan, gazteen etorkizunean modu positiboan eragin nahi dugu”. Horretarako, euskal Zientzia Sistemako eragileekin lankidetza ezinbestekoa dela adierazi du “gazteei erreferente errealak eskaini ahal izateko”. Horregatik, pozik agertu da gaurkoan, Elhuyar Zientzia Azokaren testuinguruan sinatu diren bi hitzarmen berri hauen aurrean.

NanoGUNE ikerketa-zentroak urteak daramatza puntako ikerketa egiten eta ikerketa horren gizarteratze-lana modu aktiboan egiten. Eta, gaurkoan, gazteen artean STEM asmo profesionalak sustatzeak berebiziko garrantzia duela azaldu du Txema Pitarkek.

Materialen Fisikako Zentrotik ere, Daniel Sánchez Portalek berebiziko garrantzia eman dio gazteen, eta bereziki nesken artean, puntako zientzia- eta teknologia-gaiak lantzen diren lantokietatik ere gazteekiko konpromisoa erakusteari, eta ikerketa-zentroaren ateak irekita daudela adierazi du.

Hiru eragileen helburuak bat datoz, eta helburu horiek lortzeko erakundeen arteko lankidetza eta koordinazioari esker, indarguneak ahalik eta gehien aprobetxatu ahal izango dira, ahaleginak bateratuz.

Begoñazpi ikastetxeko ikasleak Elhuyarren Zientzia Azokan irabazitako bisitan CFMra

ELHUYAR ZIENTZIA AZOKA

Ikasturtearekin batera urrian abiatu zen Zientzia Azoka proiektua, eta udaberrian egingo den azoka handiarekin bukatuko da ekitaldia. Azokan, gazteek publiko orokorrari erakutsiko dizkiete beren ikerketa-proiektuak eta ikerketa-lanak, espazio ireki eta irisgarri batean.

Hitzarmenari esker, Zientzia Azokaren aurretiko ekimen eta ekitaldietan lagunduko dute nanoGUNE-k eta CFM-k, bai eta 2020ko maiatzaren 9an Bilbon izango den azokan bertan parte hartuz ere.

Hitzarmen honen bidez, nanoGUNE-k eta CFM-k konpromisoa hartzen dute Zientzia Azokan parte hartzen duten bina gazte-talde hartzeko. Horretarako, harrera egingo zaie gazteei, zentro teknologikoa zertan dabilen azalduko zaie, eta ikertzaileekin batera arituko dira momentuan ikertzaileak dabiltzan ikerketan, bi egunez. Bestalde, lehiaketaren epaimahaian aritzeko aditu bana izendatuko dute nanoGUNE-k eta CFM-k. Zientzia Azokako lan onenen hautaketarako bileretan parte hartuko dute adituek.